Hudang sare
Irham geuwat-geuwat mandi, teu biasana manehna tanginas. Malahanmah teu
nginum-nginum acan, manehna langsung wae indit ka sakola. Amih ngahuleng bangun
heran ninggali bujang bungsuna teu siga ti sasari.
“ aneh
biasanamah can digudrag-gudrag mah can hudang budak teh. Tapi naha ari ayeuna
mani tanginas” ceuk Amih bari nuluykeun sasapu buruan.
Geus jadi
kabiasaan sapopoe Irham indit ka sakola naek beus kota. Salian ongkosna murah,
bisa leuwih gancang oge.
Tepi di sakola
Irham lain buru-buru abus kakelas, tapi ngadon indit ka kebon nu perenahna aya
di tukangeun sakola. Di ditu manehna manggihan Pa Rahman, pasapon di sakolana.
Pa Rahman geus tilu puluh taun ngabdi di saokola Irham. Gek bae Irham diuk gigireun
Pa rahman nu keur ngomean pacul.
“ Pa, peuting
tadi kuring ngimpi, tapi ngimpina teh asa aneh pa”
“Ngimpi naon
Ham? Ngimpi taeun?” tembal Pa Rahman bari nyengir.
Irham
ngahuleng, teu ngarti naon nu di omongkeun ku Pa Rahman.
“Eh ari si
bapa! Serius pa ngimpina teh aneh … eh istimewa ketang pa!!”
“Ngimpi naon
emang ?”
“Ngimpi meunang
lauk pa”
Pa Rahman tuluy
bae ngome-ngome paculna bari pok ngomong “ah eta mah biasa, istimewa belah
manana Ham?”
“Biasa? Cenah
ceuk kolot baheula lamun ngimpi meunang lauk teh sok meunang rezeki pa!”
“saha kolot
baheula teh? Rezeki mah datangna ti Gusti Alloh, lain ti ngimpi komo deui
pamere lauk mah”
Irham
ngahuleng, bingung tur mang-mang kana ucapan Pa Rahman. Tapi, manehna masih
yakin yen manehna bakal meunang rizki.
Di kelas
manehna ngawawar ka babaturanna yen manehna teh bakal meunang rizki.
“Kade ah Ham,
hanas diomong-omong ari pek teh teu jadi” ceuk salah sahiji babaturanana.
Irham tetep
yakin yen manehna pasti meunang rizki lantaran ngimpi meunang lauk peuting tadi.
Manehna geus nyieun rencana lamun manehna meunang rizki nu teu disangka-sangka
eta, manehna bakal ngajajanan kabeh batur sakelasna.
Jam dua belas
manehna geus aya di imah. Balik ti sakola manehna buru-buru balik ka imah
lantaran manehna yakin yen poe ayeuna teh bakal aya nu nganteurkeun rizki ka
imahna.
Wanci Irham
keur reureuh di ruang tamu manehna ngareret kana handapeun meja aya hiji
majalah. Tambah teuing cangkeul, dibaca eta majalah teh. Irham colohok pas muka
halaman lembar pengumuman undian. Didinya aya ngaran manehna IRHAM DWI SAPUTRA.
Matana teu
ngiceup-ngiceup maca eta pengumuman. Dina eta pengumuman teh ditulis yen anu
ngarana kasebut didinya berhak meunang motor, hadiah bisa dicokot di alamat nu
aya dina eta pengumuman.
Kesang badag
kesang lembut, tuur nyorocod jeung teu percaya yen manehna meunang motor.
“berarti bener ngimpi peuting tadi teh, kuring meunang rizki nu teu di
sangka-sangka”
Bakat ku atoh
Irham buru-buru lumpat ka dapur, bebeja ka Amih jeung ka Abah yen manehna
meunang undian motor. Amih jeung abah ge kacida bungahna. Teu kungsi lila
datang Firman jeung Mimin, lanceuk Irham, heran ninggali Amih, abah, jeung
adina raribut di dapur Firman jeung mimin geuwat-geuwat ka dapur.
“ aya naon ieu
teh meni raribut kieu?” Tanya mimin bangun panasaran
“si Irham adi
maneh meunang undian motor” tembal abah
“ wah,, undian
dina naon Ham?” Tanya Firman
Irham
ngahuleng, tapi sainget manehna mah, manehna teu pernah ngiluan undian.
“duka teuing
atuh kang, tapi da didieu aya ngaran kuring”tembal Irham bari rada bingung
keneh
“eh cing puguh
atuh, bisi salah” ceuk Firman
“Firman ari
maneh teu bisa maca? Eta sakitu jentrena aya ngaran si Irham didinya” ceuk Abah
“hayu atuh
ayeunamah urang indit wae ka alamat nu aya dina pengumuman eta, geuwat-geuwat
ah bisi kaburu telat” ceuk Amih Sumanget.
Irham jeung
keluargana kuatka ngaborong angkot, sajajalan teu euren-eureun Abah ngawawar ka
unggal jelema yen si Irham meunang motor.
Tepi di alamat
redaksi eta majalah, Irham, Abah, Amih, Firman jeung Mimin bingung. “ naha
tiiseun nya bah? Pan kudunamah rame atuh ari aya pembagian hadiah undian mah?”
Tanya Amih bari luha-loho kana gerbang eta kantor.
Teu kungsi lila
datang satpam.
“selamat sore,
ada yang bisa saya bantu?”
“ieu pa satpam,
budak abdi teh meunang undian motor, dina pengumumanna hadiah teh dicokotna di
dieu” tembal Abah
“undian?
Mungkin bapak salah alamat!” tembal pa satpam.
“ah piraku pa
satpam, da alamatna oge jelas didieu, jeung deuih dina pengumumannage geus
jentre aya ngaran abdi” tembal Irham rada napsu lantaran sieun teu bisa nyokot
hadiahna
“tapi, redaksi
kami tidak sedang mengadakan undian berhadiah pa, mungkin anda salah”
“Piraku we
salah pa, eta sakitu aya buktina yen, budak saya teh meunang motor” ceuk Abah
bari nembongkeun majalah ka pa satpam
Pa satpam seuri
nyengir maca eta majalah, gogodeg bari surungah-serengeh.
“Pa, ini memang
majalah kami, dan memang benar ini pengumuman undian dari redaksi kami”
“Naha atuh meni
hararese pisan, sok-sok kadieukeun motorna” ceuk Amih teu sabar.
Pa satpam
ngadon sura-seuri ngadenge omongan Amih “ Ibu, maaf tapi ini majalah edisi
tahun 2006, jadi undian ini sudah lima tahun yang lalu”
Irham, Amih,
Abah, mimin, jeung firman ngahuleng. Handeueul tur kacida era na yen eta undian
teh salah, sanajan didinya geus jentre aya ngaran Irham, tapi gening majalah
teh geus kadaluarsa.
“ah.. teu jadi
meunang motor teh”….
----Tamat----
